Accueil du forum >> Nostradamus Centurie X

supplement le 26-02-05 14h15

Centurie X

Adjousté depuis l'impression de 1568.

(Il est probable que ce quatrain ne soit pas de Nostradamus)

Quand le fourchu sera sous tenu de deux paux,
Avec six demi-corps et six sizeaux ouvers :
Le tres puissant Seigneur, heritier des crapaux,
Subiuguera, sous soy tout l'univers.

centurie10 le 26-02-05 00h10

VERSETS CENTURIE X

X,1
A l´ennemy, l´ennemy foi promise
Ne se tiendra, les captifs retenus :
Prins, presme mort, & le reste en chemise,
Damné le reste pour estre soustenus.

X,2
Voille gallere voil de nef cachera,
La grande classe viendra sortir la moindre,
Dix naves proches le tourneront pousser,
Grande vaincue unies a soy ioindre.

X,3
En apres cinq troupeau ne mettra hors,
Un fuytif pour Penelon laschera,
Faux murmurer, secours venir par lors,
Le chef de siege lors abandonnera.

X,4
Sus la minuict conducteur de l´armee,
Se sauvera subit esvanouy,
Sept ans apres la fame non blasmee
A son retour ne dira onc ouy.

X,5
Albi & Castres feront nouvelle ligue,
Neuf Arriens Libon & Portugues,
Carcas, Tholose consumeront leur brigue,
Quand chef neuf monstre de Lauragues.

X,6
Sardon Nemans si hault desborderont
Qu´on cuidera Deucalion renaistre,
Dans le colosse la pluspart fuyront,
Vesta sepulchre feu estaint apparoistre.

X,7
Le grand conflict qu´on appreste a Nancy,
L´Aemathien dira tout je soubmets,
L´Isle Britanne par vin, sel en solcy,
Hem. mi. deux Phi. long temps ne tiendra Mets.

X,8
Index & poulse parfondera le front
De Senegalia le Comte a son fils propre,
La Myrnamee par plusieurs de prin front
Trois dans sept iours blesses mors.

X,9
De Castillon figuieres iour de brune,
De femme infame naistra souverain prince
Surnom de chausses perhume luy posthume
Onc Roy ne fut si pire en sa province.

X,10
Tasche de meurdre, enormes adulteres,
Grand ennemy de tout le genre humain,
Que sera pire qu´ayeuls, oncles, ne peres,
En fer, feu, eau, sanguin et inhumain.

X,11
Dessous Ionchere du dangereux passage
Fera passer sa postume bande,
Les mont Pyrens passer hors son bagage,
De Parpignan courira Duc a Tende.

X,12
Esleu en Pape, d´esleu sera mocqué,
Subit soudain esmeu prompt & timide,
Par trop bon doux a mourir provoqué,
Crainte estainte la nuict de sa mort guide.

X,13
Souz la pasture d´animaux ruminant
Par eux conduict au ventre helbipolique,
Soldats cachez, les armes bruit menant,
Non loing temptez de cité Antipolique.

X,14
Urnel Vaucile sans conseil de soy mesme
Hardit timide, par crainte prins, vaincu,
Accompagné de plusieurs putains blesmes
A Barcellonne aux chartreux convaincu.

X,15
Pere duc vieux d´ans & de soif chargé,
Au iour extreme fils desniant l´esguiere
Dedans le puis vif mort viendra plongé,
Senat au fil la mort longue & legere.

X,16
Heureux au regne de France, heureux de vie
Ignorant sang, mort, fureur & rapine,
Par non flatteurs seras mis en envie,
Roy desrobé, trop de foye en cuisine.

X,17
La Royne Ergaste voyant sa fille blesme
Par un regret dans l´estomach enclos,
Crys lamentables seront lors d´Angoulesme,
Et au germain mariage forclos.

X,18
Le rang Lorrain fera place a Vendosme,
Le haut mis bas, & le bas mis haut,
Le fils de Hamon sera esleu dans Rome,
Et les deux grands seront mis en defaut.

X,19
Iour que sera par Royne saluee,
Le iour apres le salut, la priere :
Le compte fait raison & valbuee,
Par avant humble oncques ne fut si fiere.

X,20
Tous les amis qu´auront tenu party,
Pour rude en lettres mis mort & saccagé,
Bien oubliez par fixe grand neanty,
Onc Romain peuple ne fut tant outragé.

X,21
Par le despit du roy soustenant moindre,
Sera meurdry luy presentant les bagues
Le pere au fils voulant noblesse poindre
Fait, comme a Perse iadis feirent les Magues.

X,22
Pour ne vouloir consentir au divorce,
Qui puis apres sera cognu indigne,
Le roy des Isles sera chassé par force,
Mis a son lieu qui de roy n´aura signe.

X,23
Au peuple ingrat faictes les remonstrances,
Par lors l´armee se saisira d´Antibe,
Dans l´arc Monech feront les doleances
Et a Freius l´un l´autre prendra ribe.

X,24
Le captif prince aux Itales vaincu
Passera Gennes par mer iusqu´a Marseille,
Par grand effort les forens survaincu,
Sauf coup de feu barril liqueur d´abeille.

X,25
Par Nebro ouvrir de Brisanne passage,
Bien esloignez el rago fara muestra,
Dans Pelligouxe sera commis l´outrage
De la grand dame assise sur l´orchestra.

X,26
Le successeur vengera son beau frere,
Occuper regne sous ombre de vengeance,
Occis ostacles on sang mort vitupere,
Long temps Bretaigne tiendra avec la France.

X,27
Par le cinquieme & un grand Hercules
Viendront le temple ouvrir de main bellique,
Un Clément Iule & Ascans recules,
Lespee clef aigle, connurent onc si grand picque.

X,28
Second & tiers qui font prime musique
Sera par Roy en honneur sublimée,
Par grasse & maigre presque demy eticque
Rapport de Vénus faulx rendra déprimee.

X,29
De Pol Mansol dans caverne caprine
Caché & prins extrait hors par la barbe,
Captif mené comme bete mastine
Par Begourdans amenée pres de Tarbe.

X,30
Nepveu & sang du saint nouveau venu,
Par le surnom coustient arcs & couvert
Seront chassez & mis a mort chassez nu,
En rouge & noir convertiront leur vert.

X,31
Le sainct empire viendra en Germanie,
Ismaëlites trouveront lieux ouverts,
Anes voudront aussi la Carmanie,
Les soustenans de terre tous couverts.

X,32
Le grand empire chacun an devoit estre,
Un sur les autres le viendra obtenir :
Mais peu de temps sera son regne & estre,
Deux ans aux naves se pourra soustenir.

X,33
La faction cruelle a robbe longue,
Viendra cacher souz les pointus poignards :
Saisir Florence le duc & lieu diphlongue,
Sa descouverte par immurs & flangnards.

X,34
Gaulois qu´empire par guerre occupera,
Par son beau frere mineur sera trahy,
Par cheval rude voltigeant trainera,
Du fait le frere long temps sera hay.

X,35
Puisnay royal flagrand d´ardant libide,
Pour se iouyr de cousine germaine :
Habit de femme au temple d´Arthemide :
Allant meurdry par incognu du Maine.

X,36
Apres le Roy du soucq guerres parlant
L´isles Harmotique le tiendra a mespris,
Quelques ans bons rongeant un & pillant,
Par tyrannie a l´Isle changeant pris.

X,37
L´assemblee grande pres du lac de Borget,
Se rallieront pres de Montmelian :
Marchans plus outre pensifs feront proget,
Chambry Moriane combat sainct Iulian.

X,38
Amour alegre non loing pose le siege,
Au sainct barbare seront les garnisons :
Ursins Hadrie pour Gaulois feront plaige,
Pour peur rendus de l´armee aux Grisons

X,39
Premier fils venu malheureux mariage,
Sans nuls enfans aux Isles en discord,
Avant dix huict incompetent en age,
De l´autre pres plus bas sera l´accord.

X,40
Le ieune nay au regne Britanique,
Qu´aura le pere mourant recommandé,
Iceluy mort Lonole donra topique,
Et a son fils le regne demandé.

X,41
En la frontiere de Caussade et Charlus,
Non guieres loing du fond de la vallee,
De ville Franche musique a son de luths,
Environnez combouls & grand mittee.

X,42
Le regne humain d´Anglique geniture,
Fera son regne paix union tenir :
Captive guerre demy de sa closture,
Long temps la paix leur fera maintenir

X,43
Le trop bon temps trop de bonté royalle,
Faits & deffais prompt subit negligence :
Legiers croira faux d´espouse loyalle,
Luy mis a mort par sa bénévolence.

X,44
Par lors qu´un Roy sera contre les siens,
Natif de Bloye subiuguera les Ligures,
Mammel, Cordube & les Dalmatiens,
Des sept puis l´ombre a Roy estrennes & lemures.

X,45
L´ombre du regne de Navarre non vray,
Fera la vie de fort illegitime :
La veu promis incertain de Cambray,
Roy Orleans donra mur légitime.

X,46
Vie sort mort de l´or vilaine indigne,
Sera de Saxe non nouveau electeur :
De Brunsvic mandra d´amour signe,
Faux le rendant au peuple seducteur.

X,47
De Bourze ville a la dame Guyrlande,
L´on mettra sus par trahison faicte
Le grand Prelat de Leon par Formande,
Faux pellerins & ravisseurs deffaicte.

X,48
Du plus profond de l´Espaigne enseigne,
Sortant du bout & ses fins de l´Europe,
Troubles passant aupres du pont de Laigne,
Sera deffaicte par bande sa grand troupe.

X,49
Iardin du monde aupres de cité neufve
Dans le chemin des montagnes cavees :
Sera saisi & plongé dans la cuve,
Beuvant par force eaux soulphre envenimees.

X,50
La Meuse au iour de terre Luxembourg
Découvrira Saturne & trois en lurne :
Montaigne & plaine, ville, cité & bourg,
Lorrain deluge, trahison par grand hurne.

X,51
Des lieux plus bas du pays de Lorraine,
Seront des basses Allemaignes unis :
Par ceux du siege Picards, Normans, du Maisne
Et aux cantons se seront reünis.

X,52
Au lieu ou Laye et Scelde se marient,
seront les noces de long temps maniees :
Au lieu d´Anvers où la crappe charient,
Ieune vieillesse consorte Intaminee.

X,53
Les trois pelices de loing s´entrebatron,
La plus grand moindre demeurera a l´escoute:
Le grand Selin n´en sera plus patron,
Le nommera feu peltre blanche routte.

X,54
Nee en ce monde par concubine fertive,
A deux hault mise par les tristes nouvelles,
Entre ennemis sera prinse captive,
Amenee a Malings & Bruxelles.

X,55
Les malheureuses nopces celebreront
En grande ioye : mais la fin malheureuse,
Mary, mere nore desdaigneront,
Le Phybe mort, & nore plus piteuse.

X,56
Prelat royal son baissant trop tiré,
Grand flux de sang sortira par sa bouche,
Le regne Anglicque par regne respiré,
Long temps mort vifs en Tunis comme souche.

X,57
Le sublevé ne cognoistra son sceptre,
Les enfans ieunes des plus grands honnira :
Oncques ne fut un plus or cruel estre,
Pour leurs espouses a mort noir bannira.

X,58
Au temps du dueil que le selin monarque
Guerroyera le ieune Aemathien :
Gaule bransler, perecliter la barque,
Tenter Phossens au Ponant entretien.

X,59
Dedans Lyon vingt-cinq d´une halaine,
Cinq citoyens Germains, Bressans, Latins;
Par dessous noble conduiront longue traine
Et descouverts par abbois de mastins.

X,60
Ie pleure Nisse, Mannego, Pize, Gennes,
Savonne, Sienne, Capue, Modene, Malte;
Le dessus sang, & glaive par estrennes,
Feu trembler terre, eau, malheureuse nolte.

X,61
Betta, Vienne, Emorre Sacarbance,
Voudront livrer aux Barbare Pannone :
De feu & sang en cité de Bisance
Les coniurez descouverts par matrone.

X,62
Pres de Sorbin pour assaillir Ongrie,
L´heraut de Brudes les viendra avertir :
Chef Bisantin, Sallon de Sclavonie,
A loy d´Arabes les viendra convertir.

X,63
Cydron, Raguse, la cité au sainct Hieron,
Reverdira le medicant secours :
Mort fils de Roy par mort de deux heron,
L´Arabe, Ongrie feront un mesme cours.

X,64
Pleure Milan, pleure Lucques, Florance,
Que ton grand Duc sur le char montera,
Changer le siege pres de Venise s´advance,
Lors que Colonne a Rome changera.

X,65
O vaste Rome ta ruyne s´approche
Non de tes murs, de ton sang & substance :
L´aspre par lettres fera si horrible coche,
Fer poinctu mis a tous iusques au manche.

X,66
Le chef de Londres par regne l´Americh,
L´isle d´Escosse t´empiera par gelee :
Roy Reb auront un si faux Antechrist,
Qui les mettra trestous dans la meslee.

X,67
Le tremblement si fort au mois de May,
Saturne, Caper, Iupiter, Mercure au Boeuf,
Venus, aussi Cancer, Mars en Nonnay,
Tombera Gresle lors plus grosse qu´un oeuf.

X,68
L´armee de mer devant cité tiendra,
Puis partira sans faire longue allee :
Citoyens grande proye en terre prendra,
Retourner classe reprendre grande emblee.

X,69
Le fer luysant le neuf vieux eslevé,
Seront si grands par Midy Aquilon :
De sa seur propre grandes alles levé,
Fuyant meurdry au buisson d´Ambellon.

X,70
Loeil par object fera telle excroissance,
Tant & ardente que tombera la neige.
Champs arrousé viendra en descroissance,
Que le primat succombera a Rege.

X,71
La terre, & l´air geleront si grande eau,
Lors qu´on viendra pour Ieudy venerer
Ce qui sera iamais ne fut si beau,
Des quatre parts le viendront honorer.

X,72
L´an mil neuf cens nonante neuf sept mois,
Du Ciel viendra un grand Roy d´effrayeur :
Resusciter le grand Roy d´Angoulmois,
Avant apres Mars regner par bonheur.

X,73
Le temps present d´avecques le passé,
Sera jugé par le grand Iovialiste :
Le monde tard luy sera lassé,
Et desloyl par le clergé iuriste.

X,74
Au revolu du grand nombre septiesme,
Apparoistra au temps ieux d´Hecatombe,
Non esloigné du grand aage milliesme,
Que les entrez sortiront de leur tombe.

X,75
Tant attendu ne reviendra jamais
Dedans l´Europe, en Asie apparoistra,
Un de la ligue du grand Hermes,
Et sur tous Roys des Orients croistra.

X,76
Le grand Senat discernera la pompe,
A l´un qu´apres sera vaincu chassez,
Ses adherans seront a son de tromps
Biens publiez, ennemis dechassez.

X,77
Trente adherans de l´ordre des quirettes,
Bannis, leurs biens donnez ses adversaires,
Tous leurs bienfaits seront pour demerites,
Classe espargie delivrez aux Corsaires.

X,78
Subite ioyee en subite tristesse,
Sera a Rome aux graces embrassees,
Dueil, cris, pleurs, larm sang excellent liesse,
Contraires bandes surprinses & troussees.

X,79
Les vieux chemins seront tous embellis,
L´on passera a Memphis somentrees,
Se grand Mercure d´Hercules fleur de lys
Faisant trembler terre, mer, & contrees.

X,80
Au regne grand du grand regne regnant
Par force d´armes les grandes portes d´airain
Fera ouvrir, le Roy & Duc ioignant,
Port demoly, nef a fons, iour serain.

X,81
Mis tresor temple citadins Hesperiques,
Dans iceluy retiré en secret lieu :
Le temple ouvrir les liens fameliques,
Reprens, ravis, proye horrible au milieu.

X,82
Cris, pleurs, larmes viendront avec couteaux,
Semblant fuir, donront dernier assault :
L´entour parques planter profonds plateaux,
Vifs repoussez & meurdris de prinsault.

X,83
De batailler ne sera donné signe,
Du parc seront contraints de sortir hors :
De Gand l´entour sera cogneu l´ensigne,
Qui fera mettre de tous les siens morts.

X,84
Le naturelle a son plus hault non bas,
Le tard retour fera maris contens :
Le Recloing ne sera sans debats,
En employant & perdant tout son temps.

X,85
Le vieil tribun au point de la trehemide
Sera pressee, captif ne delivrer,
Le vueil non vueil, le mal parlant timide,
Par legitime a ses amis livrer.

X,86
Comme un gryphon viendra le Roy d´Europe,
Accompagné de ceux d´Aquilon,
De rouges & blancs conduira grande troupe,
Et iront contre le Roy de Babylon.

X,87
Grand Roy viendra prendre port pres de Nisse,
Le grand empire de la mort si en fera
Aux antipolles posera son genisse,
Par mer la Pille tout esvanouyra.

X,88
Pieds & Cheval a la seconde veille
Feront entree vastient tout par la mer :
Dedans le poil entrera de Marseille,
Pleurs, cris & sang, onc nul temps si amer.

X,89
De brique en marbre seront les murs reduits,
Sept et cinquante annees pacifiques :
Ioye aux humains, renoue l´aqueduict,
Santé, grands fruicts, ioye & temps melifique.

X,90
Cent fois mourra le tyran inhumain,
Mis a son lieu sçavant & debonnaire,
Tout le Senat sera dessous sa main,
Faché sera par malin temeraire.

X,91
Clergé Romain l´an mil six cens & neuf,
Au chef de l´an fera election :
D´un gris & noir de la Compagne yssu,
Qui onc ne fut plus maling.

X,92
Devant le pere l´enfant sera tué,
Le pere apres entre cordes de ionc,
Genevois peuple sera esvertué,
Gisant le chef au milieu comme un tronc.

X,93
La barque neufve recevra les voyages,
La & aupres transferont l´Empire:
Beaucaire, Arles retiendront les hostages,
Pres deux colonnes trouvees de Porphire.

X,94
De Nismes, d´Arles, & Vienne contemner,
N´obey tout a l´édict d´Hespérique :
Aux labouriez pour le grand condamner,
Six eschappez en habit seraphicque.

X,95
Dans les Espaignes viendra Roy tres puissant,
Par mer & terre subiuguant or Midy :
Ce mal fera, rabaissant le croissant,
Baisser les aisles a ceux du Vendredy.

X,96
Religion du nom de mers vaincra,
Contre la secte fils Adaluncatif,
Secte obstinee de ploree craindra
Des deux blessez par Aleph & Aleph.

X,97
Triremes pleines tous aage captifs,
Temps bon a mal, le doux pour amertume :
Proye a Barbares trop tost seront hastifs,
Cupide de voir plaindre au vent la plume.

X,98
La splendeur claire a pucelle joyeuse
Ne luyra plus, longtemps sera sans sel,
Avec marchans, ruffiens, loups odieuse,
Tous pesle mesle monstre universel.

X,99
La fin le loup, le lyon boeuf & l´asne,
Timide dama seront avec mastins :
Plus ne cherra a eux la douce mannne,
Plus vigilance & custode aux mastins.

X,100
Le grand Empire sera par Angleterre,
Le pempotam des ans plus de trois cens :
Grandes copies passer par mer & terre,
Les Lusitains n´en seront pas contens.