Accueil du forum >> Nostradamus Sixains

sixains le 26-02-05 14h21

S, 1
Siecle nouveau, alliance nouvelle,
Un Marquisat mis dedans la nacelle,
A qui plus fort des deux l´emportera :
D´un Duc, d´un Roy, gallere de Florence,
Port a Marseille, Pucelle dans la France,
De Catherine fort chef on rasera.

S, 2
Que d´or, d´argent fera despendre,
Quand Comte voudra ville prendre,
Tant de mille & mille soldats,
Tuez, noyez sans y rien faire,
Dans plus forte mettra pied a terre,
Pigmée ayde des Censuarts.

S, 3
La ville sans dessus-dessous,
Renversee de mille coups
De canons: & forts dessous terre :
Cinq ans tiendra: le tout remis,
Et laschee a ses ennemis,
L´eau leur fera apres la guerre.

S, 4
D´un rond, d´un lis, naistra un si grand prince,
Bien tost & tard venu dans sa Province,
Saturne en libra en exaltation :
Maison de Venus en descroissante force,
Dame en apres masculin soubs l´escorse,
Pour maintenir l´heureux sang de Bourbon.

S, 5
Celuy qui la Principauté
Tiendra par grande cruauté,
A la fin verra grand phalange :
Par coup de feu tres-dangereux,
Par accord pourroit faire mieux,
Autrement boira suc d´Orange.

S, 6
Quand le Robin la traitreuse entreprise
Mettra Seigneurs & en peine un grand Prince,
Sceu par la Fin, chef on lui trenchera :
La plume au Vent, amye dans Espaigne,
Poste attrappé estant en la campagne,
Et l´escrivain dans l´eauë se iettera.

S, 7
La sangsue au loup se ioindra,
Lors qu´en mer le bled defaudra,
mais le Prince sans envie,
Par ambassade lui donra
De son bled, pour lui donner vie,
Pour un besoin s´en pourvoira.

S, 8
Un peu devant l´ouvert commerce,
Ambassadeur viendra de Perse,
Nouvelle au franc pays porter :
Mais non receu, vaine esperance,
A son grand Dieu sera l´offense,
Feignant de le vouloir quitter.

S, 9
Deux estendars du costé de l´Auvergne,
Senestre pris, pour un temps prison regne,
Et une Dame enfans voudra mener :
Au Censuart, mais descouvert l´affaire
Danger de mort murmure sur la terre,
Germains, Bastille frere & soeur prisonnier.

S, 10
Ambassadeur pour une Dame,
A son vaisseau mettra la rame,
Pour prier le grand medecin :
Que de l´oster de telle peine,
Mais en ce s´opposera Royne
Grand peine avant qu´en veoir la fin.

S, 11
Durant ce siecle on verra deux ruisseaux,
Tout un terroir innonder de leurs eaux,
Et submerger par ruisseaux et fontaines :
Coups & Moufrin Beccoyran, & Ales
Par le gardon bien souvent travaillez,
Sis cens & quatre alez, et trente moines.

S, 12
Six cens & cinq tres grand´nouvelle,
De deux Seigneurs la grande querelle,
Proche de Génaudan sera,
A une Eglise apres l´offrande
Meurtre commis, prestre demande
Tremblant de peur se sauvera.

S, 13
L´aventurier six cens & six ou neuf,
Sera surpris par fiel mis dans un oeuf,
Et peu apres sera hors de puissance
Par le puissant Empereur general,
Qu´au monde n´est un pareil ny esgal,
Dont un chascun luy rend obeissance.

S, 14
Au grand siege encore grands forfaits,
Recommençant plus que iamais
Six cens & cinq sur la verdure,
La prise & reprise sera
Soldats és champs iusqu´en froidure
Puis apres recommencera.

S, 15
Nouveau esleu patron du grand vaisseau,
Verra long temps briller le clerc flambeau
Qui sert de lampe a ce grand territoire,
Et auquel temps armez sous son nom,
Ioinctes a celles de l´heureux de Bourbon
Levant, Ponant, & Couchant sa memoire.

S, 16
En Octobre six cens & cinq,
Pourvoyeur du monstre marin,
Prendra du souverain le cresme
Ou en six cens & six en Iuin,
Grand´ioye aux grands & au commun
Grands faits apres ce grand baptesme.

S, 17
Au mesme temps un grand endurera,
Ioyeux mal sain, l´an complet ne verra,
Et quelques uns qui seront de la feste,
Feste pour un seulement, a ce iour,
Mais peu apres sans faire un long seiour,
Deux se donront, l´un l´autre de la teste.

S, 18
Considérant la triste Philomelle
Qu´en pleurs & cris sa peine renouvelle,
Raccourcissant par tel moyen ses iours,
Six cens & cinq, elle en verra l´issue,
De son tourment, ia la toile tissue,
Par son moyen senestre aura secours.

S, 19
Six cens & cinq, Six cens & six & sept,
Nous monstrera iusques l´an dixsept,
Du boutefeu lire, hayne & envie,
Soubs l´olivier d´assez long temps caché,
Le Crocodil sur la terre a caché,
Ce qui estoit mort, sera pour lors en vie.

S, 20
Celui qui a par plusieurs fois
Tenu la cage & puis les bois,
R´entre a son premier estre
Vie sauve peu apres sortir,
Ne se sçachant encore cognoistre,
Cherchera subiet pour mourir

S, 21
L´autheur des maux commencera regner
En l´an six cens & sept sans espargner
Tous les subiets qui sont a la sangsuë,
Et puis apres s´en viendra peu a peu,
Au franc pays r´allumer son feu,
S´en retournant d´où elle est yssue.

S, 22
Cil qui dira, decouvrissant l´affaire,
Comme la mort, la mort pourra bien faire
Coups de poignards par un qu´auront induit,
Sa fin sera pis qu´il n´aura fait faire
La fin conduit les hommes sur la terre,
Gueté partout, tant le iour que la nuit.

S, 23
Quand la grand nef, la proüe & gouvernail,
Du franc pays & son esprit vital,
D´escueils & flots par la mer secoüee,
Six cens & sept, & dix coeur assiegé
Et des reflus de son corps affligé,
Sa vie estant sur ce mal renoüee.

S, 24
Le Mercurial non loin de longue vie,
Six cens et Huict & vingt, grand maladie,
Et encor pis danger du feu & d´eau,
Son grand amy lors lui sera contraire,
De tels hazards ne pourront bien distraire,
Mais bref, le fer lui fera son tombeau.

S, 25
Six cens & six, six cens & neuf,
Un Chancelier gros comme un boeuf,
Vieux comme le PhÇnix du monde,
En ce terroir plus ne luyra,
De la nef d´oubly passera
Aux champs Elisiens faire ronde.

S, 26
Deux freres sont de l´ordre Ecclesiastique,
Dont l´un prendra pour la France la pique,
Encor un coup, si l´an six cens & six
N´est affligé d´une grand´maladie,
Les armes en mains iusqu´en six cents et dix,
Guieres plus loing ne s´estendant sa vie.

S, 27
Celeste feu du costé d´Occident,
Et du midy, courir iusqu´au levant,
Vers demy morts sans point trouver racine
Troisiesme aage, a Mars le belliqueux,
Des Escarboucles on verre briller feu,
Aage Escaboucle, & a la fin famine.

S, 28
L´an mil six cens & neuf ou quatorzieme,
Le Vieux Charon fera Pasques en Caresme
Six cens & six par escrit le mettra
Le médecin, de tout cecy s´estonne,
A mesme temps assigne en personne
Mais pour certains l´un d´eux comparoistra.

S, 29
Le Griffon ne peut apprester
Pour a l´ennemy resister
Et renforcer bien son armee,
Autrement l´Elephant viendra,
Qui d´un abord le surprendra,
Six cens & huict, mer enflammee.

S, 30
Dans peu de temps Medecin du grand mal,
Et la sangsue d´ordre & rang inegal,
Mettront le feu a la branche d´Olive,
Poste courir, d´un & d´autre costé,
Et par tel feu leur Empire accosté,
Se r´alumant du franc finy salive.

S, 31
Celui qui a, les hasards surmonté,
Qui fer, feu, eauë, n´a iamais redouté,
Et du pays bien proche du Basacle,
D´un coup de fer tout le monde estonné,
Par Crocodil estrangement donné,
Peuple ravi de veoir tel spectacle.

S, 32
Vin a foison, tres bon pour les gendarmes,
Pleurs & soupirs, plainctes cris & alarmes
Le Ciel fera ses tonnerres pleuvoir
Feu, eau & sang, le tout meslé ensemble,
Le Ciel de sol, en fremit & en tremble,
Vivant n´a veu ce qu´il pourra bien veoir.

S, 33
Bien peu apres sera tres-grand misere,
Du peu de bled, qui sera sur la terre,
Du Dauphiné, Provence et Viverois,
Au Vivaeois est un pauvre presage,
Pere du fils sera antropophage,
Et mangeront racine & gland du bois.

S, 34
Princes & seigneurs tous se feront la guerre,
Cousin germain, le frere avec le frere,
Finy l´Arby de l´heureux de Bourbon,
De Hierusalem les princes tant aymables,
Du fait commis enorme & execrable,
Se ressentiront sur la bourse sans fond.

S, 35
Dame par mort grandement attristee,
Mere & tutrice du sang qui l´a quittee,
Dame & seigneurs, faits enfants orphelins,
Par les aspics & par les Crocodilles,
Seront surpris forts Bourgs, Chateaux et Villes,
Dieu tout puissant les garde des malins.

S, 36
La grand rumeur qui sera par la France
Les impuissant voudront avoir puissance,
Langue emmiellee & vrays Cameleons,
De boute-feux, allumeurs de chandelles,
Pyes & geys, rapporteurs de nouvelles
Sont la morsure semblera Scorpions.

S, 37
Foible & puissant seront en grand discord,
Plusieurs mourront avant faire l´accord
Foible au puissant vainqueur se fera dire,
Le plus puissant au ieune cedera,
Et le plus vieux des deux decedera,
Lors que l´un d´eux envahira l´Empire.

S, 38
Par eau, & par fer, & par grande maladie,
Le pourvoyeur a l´hazard de sa vie
Sçaura combien vaut le quintal de bois,
Six cent & quinze, ou le dixneufiesme,
On gravera d´un grand Prince cinquiesme
l´immortel nom, sur le pied de la Croix.

S, 39
Le pourvoyeur du monstre sans pareil,
Se fera voir ainsi que le Soleil,
Montant le long la ligne Méridienne,
En poursuivant l´Eléphant & le loup
Nul empereur ne fit iamais tel coup,
Et rien plus pis a ce Prince n´advienne.

S, 40
Ce qu´en vivant le pere n´avoit sceu,
Il acquerra par guerre, ou par feu,
Et combattra la sangsuë irritée,
Ou iouyra de son bien paternel
Et favory du grand Dieu Eternel
Aura bien tost sa Province heritée.

S, 41
Vaisseaux, galleres avec leurs estendar,
S´entrebattront pres du mont Gilbattar,
Et lors sera fors fait a Pampelonne,
Qui pour son bien souffrira mille maux,
Par plusieurs fois soustiendra les assaux
Mais a la fin unie a la Couronne.

S, 42
La grand´Cité ou est le premier homme,
Bien amplement la ville ie vous nomme,
Tout en alarme, & le soldat és champs
Par fer & eaue, grandement affligee,
Et a la fin, des François soulagee,
Mais re sera des six cens & dix ans.

S, 43
Le petit coing, Provinces mutinees,
Par forts Chasteaux se verront dominees,
Encor un coup par la gent militaire,
Dans bref seront fortement assiegez,
Mais ils seront d´un tres grand soulagez,
Qui aurait fait entree dans Beaucaire.

S, 44
La belle roze en la France admiree,
D´untres grand Prince a la fin desiree,
Six cens & dix, lors naistront ses amours
Cinq ans apres, sera d´un grand blessee
Du trait d´Amour, elle sera enlassee,
Si a quinze ans du Ciel reçoit secours.

S, 45
De coup, de fer tout le monde estonné,
Par Crocodil estrangement donné,
A un bien grand , parent de la Sangsuë,
Et peu apres sera un autre coup
De guet a pend, commis contre le loup,
Et de tels faits on ne verra l´issuë.

S, 46
Le pourvoyeur mettra tout en desroute,
Sangsuë et loup, en mon dire n´escoutte
Quand Mars sera au signe du Mouton
Ioint a Saturne, et Saturne a la Lune,
Alors sera ta plus grande infortune,
Le Soleil lors en exaltation.

S, 47
Le grand d´Hongrie, ira dans la nacelle,
Le nouveau né, fera guerre nouvelle
A son voisin qu´il tiendra assiegé,
Et le noireau avec son altesse,
Ne souffrira, que par trop on le presse,
Durant trois ans ses gens tiendra rangé.

S, 48
Du vieux Charon on verra le Phoenix,
Estre le premier & dernier de ses fils,
Reluire en France, & d´un chacun aymable,
Regner longtemps avec tous les honneurs
Qu´auront iamais eu ses predecesseurs
Dont il rendra sa gloire memorable.

S, 49
Venus & Sol, Iupiter & Mercure
Augmenteront le genre de nature
Grande Alliance en France se fera,
Et du Midy la sangsuë de mesme,
Le feu esteint par ce remede extreme,
En terre ferme Olivier plantera.

S, 50
Un peu devant ou apres l´Angleterre
Par mort de loup, mise aussi bas que terre,
Verra le feu resister contre l´eaue,
Le r´alumant avecques telle force
Du sang humain, dessus l´humaine escorce
Faute de pain, bondance de couteaux.

S, 51
La ville qu´avoit en ses ans
Combattu l´iniure du temps,
Qui de son vainqueur tient la vie,
Celuy qui premier l´a surprist,
Que peu apres François réprist,
Par combats encor affoiblie.

S, 52
La grand Cité qui n´a pain qu´a demy,
Encor un coup la saint Berthelemy
Engravera au profond de son ame,
Nismes, Rochelle, Geneve & Montpellier,
Castre, Lyon, Mars entrant au Belier,
S´entrebattront le tout pour une Dame.

S, 53
Plusieurs mourront avant que Phoenix meure,
Iusque six cens septante est sa demeure,
Passé quinze ans, vingt & un, trente neuf,
Le premier est subiet a maladie,
Et le second au fer danger de vie,
Au feu a l´eau, est subiet trente neuf.

S, 54
Six cens & quinze, vingt, Grand Dame mourra
Et peu apres un fort long temps plouvra,
Plusieurs pays Flandre & l´Angleterre
Seront par feu & par fer affligez,
De leurs voisins longuement assiegez,
Contraints seront de leur faire la guerre.

S, 55
Un peu avant ou apres tres grand´Dame
Son ame au Ciel, & son corps soubs le lame,
De plusieurs gens regrettee sera,
Tous ses parens seront en grand tristesse,
Pleurs & soupirs d´une Dame en ieunesse,
Et a deux grands, le dueil delaissera.

S, 56
Tost l´Elephan de toutes parts verra
Quand pourvoyeur au Griffon se ioindra,
Sa ruine proche et Mars qui touiours gronde
Fera grand faits aupres de terre saincte
Grands estendars sur la terre & sur l´onde,
Si la nef a esté de deux freres enceinte.

S, 57
Peu apres l´alliance faite,
Avant solemniser la feste,
L´Empereur le tout troublera
Et la nouvelle mariee
Au franc pays par sort liee,
Dans peu de temps apres mourra.

S, 58
Sangsue en peu de temps mourra,
Sa mort bon signe nous donra,
Pour l´accroissement de la France,
Alliance se trouveront
deux grands Royaumes se ioindront,
François aura sur eux puissance.