Accueil du forum >> Epitre a Henry

henry le 26-02-05 15h37

H1- A l´invincible tres puissant et tres Chrétien Henry roy de France propice, Michel Nostradamus son tres-humble et tres-obéissant serviteur et sujet, victoire et félicité.

H2 - Pour icelle observation que i´ay eu, ô tres-Chrestien et tres-victorieux Roy, depuis que ma face estant long temps obnubilee se presente au devant de la deité de votre Majesté immesuree, depuis en ça i´ay esté perpetuellement esblouy, ne desistant d´honorer et dignement venerer iceluy iour que premierement devant icelle ie me presentay, comme a une singuliere Majesté humaine.

H3 - Or, cherchant quelque occasion par laquelle ie peusse manifester le bon coeur et franc courage, que moyennant iceluy mon pouvoir eusse faict ample extension, de cognoissance envers vostre sérénissime Majesté.

H4 - Or voyant que par effect le déclarer ne m´estoit possible, ioint avec mon singulier désir de ma tant longue obtenetration et obscurité, estre subitement esclarcie et transportée au devant de la face du souverain oeil, et du premier Monarque de l´Univers, tellement que j´ai été en doute longuement a qui iue viendrois consacrer ces trois Centuries du restant de mes prophéties, parachevant la miliade, et apres avoir eu longuement cogité d´une téméraire audace, ay pris mon addresse envers votre Majesté,

H5 - n´estant pour cela estonné, comme raconte le gravissime auteur Plutarque en la vie de Lycurgue, que voyant, les offres et présens qu´on faisoit par sacrifices aux temples des dieux immortels d´iceluy temps, et a celle fin que l´on ne s´estonnast par trop souvent desdists fraiz et mises ne s´osoyent presenter aux temples.

H6 - Ce nonobstant voyant vostre splendeur Royalle, accompagnee d´une incomparable humanité, ay pris mon addresse non comme aux Roys de Perse, qu´il n´estoit nullement permis d´aller a eux, ny moins s´en approcher. Mais a un tres prudent, a un tres sage Prince, i´ay consacré mes nocturnes et prophétiques supputations composées plustost d´un naturel instinct, accompagné d´une fureur poëtique, que par reigles de po&;sie, et la plupart composé et accordé a la calculation Astronomique, correspondant aux ans, moys et sepmaines des régions, contrees, et de la plupart des Villes, et Citez de toute l´Europe, comprenant de l´Afrique et une partie de l´Asie par le changement des régions, qui s´approchent la plus part de tous ces climats, et composé d´une naturelle faction :

H7 - respondra quelqu´un qui auroit bien besoin de soy moucher, la rithme estre autant facile, comme l´intelligence du sens est difficile. Et pource, ô tres-humanissime Roy, la plupart des quatrains prophétiques sont tellement scabreux, que l´on ne sçauroit y donner voye ny moins aucuns interpreter,

H8 - toutesfois esperant de laisser par escrit les ans, villes, citez, régions où la plus part adviendra, mesmes de l´année 1585 et de l´année 1606 accommençant depuis le temps présent, qui est le quatorziesme de Mars, 1557, et passant outre bien loing iusques a l´advenement qui sera apres au commencement du septiesme millenaire profondément supputé, tant que mon calcul astronomique et autre sçavoir s´a peu estendre, où les adversaires de Iesus-Christ et de son Eglise, commenceront plus fort de pulluler,

H9 - le tout a esté composé et calculé en iours et heures d´election et bien disposees, et le plus iustement qu´il m´a esté possible. Et le tout Minerva libera, et non invita, supputant presque autant les adventures du temps advenir, comme les aages passez, comprenant de present, et de ce que par le cours du temps par toutes les régions que l´on cognoistra advenir, tout ainsi nommement comme il est escrit, n´y mettant rien de superflu, combien que l´on dise : Quo de futuris non est determinata omnino véritas.

H10 - Il est bien vray Sire, que pour mon naturel instinct qui m´a esté donné par mes avites, ne cuidant presager, et adjoustant et accordant iceluy naturel instinct avec ma longue supputation uny, et vuidant l´ame, l´esprit et le courage de toute cure, solicitude et fascherie par repos et tranquilité de l´esprit. Le tout accordé et présagé l´une partie tripode aeneo.

H11 - Combien qu´ils sont plusieurs qui m´attribuë ce qu´est autant a moy, comme de ce que n´en est rien, Dieu seul eternel, qui est prescrutateur des humains courages pie, iuste, et miséricordieux, en est le vray iuge, auquel ie prie qu´il me veuille defendre de la calomnie des meschants, qui voudroyent aussi calomnieusememt s´enquerir pour quelle cause tous vos antiquissimes progeniteurs Roy de France ont guery des escroüelles, et les autres nations ont guery de la morsure des serpens, les autres ont eu certain instinct de l´art divinatrice, et d´autres cas qui seroyent long ici a raconter.

H12 - Ce nonobstant ceux a qui la malignité de l´esprit malin ne sera comprins par le cours du temps apres la terrene mienne extinction, plus sera mon escrit qu´a mon vivant, cependant si ma supputation des ages ie faillois ou ne pourroit estre selon la volonté d´aucuns. Plaira a vostre plus qu´imperialle Majesté me pardonner, protestant devant Dieu et ses Saincts, que ie ne pretends de mettre rien quelconque par escrit en la presente espistre, qui soit contre la vraye foy Catholique,

H13 - conferant les calculations Astronomiques, iouxte mon sçavoir : car l´espace de temps de nos premiers, qui nous ont precedez sont tels, me remettant sous la correction du plus sain jugement. Adam fut devant Noé environ mille deux cens quarante deux ans, ne computant pas les temps par la supputation des Gentils, comme a mis par escrit Varon : mais tant seulement selon les sacrées Escritures, et selon la foiblesse de mon esprit, en mes calculations Astronomiques.

H14 - Apres Noé, de luy et de l´universel deluge, vint Abraham environ mille huictante ans, lequel a éte souverain Astrologue, selon aucun, il inventa premier les lettres Chaldaïques : apres vint Moyse, environ cinq cens quinze ou seize ans, et entre le temps de David et Moyse, ont esté cinq cent septante ans la environ. Puis apres entre le temps de David, et le temps de notre sauveur et Redempteur Iésus-Christ, nay de l´unique Vierge, ont esté (selon aucuns Chronographes) trois cens cinquante ans : pourra objecter quelqu´un cette supputation n´estre veritable, pource qu´elle differe de celle d´Eusebe. Et depuis le temps de l´humaine redemption iusque a la seduction detestable des Sarrazins, sont esté six cens vingt et un ans, la environ depuis en ça l´on peut facilement colliger quels temps sont passez, si la mienne supputation n´est bonne et valable par toutes nations, pour ce que le tout a été calculé par le cours celeste, par association d´esmotion infuse a certaines heures delaisses par l´esmotion de mes antiques progeniteurs :

H15 - Mais l´iniure du temps, ô serenissime Roy, requiert que de tels secrets evenemens ne soient manifestez que par aenigmatique sentence, n´ayant qu´un seul sens et unique intelligence, sans y avoir rien mis d´ambigue n´amphibologique calculation : mais plustost sous obnubilée obscurité par une naturelle infusion approchant a la sentence d´un des mille et deux Prophetes, qui ont esté depuis la creation du monde, iouxte la supputation et Chronique punique de Ioel. Effundam spiritum meum super omnem carmen et prophetabunt filii vestri, et filii verstre. Mais telle prophetie procedoit de la bouche du Sainct Esprit, qui estoit la souveraine puissance eternelle, adioincte avec la celeste a d´aucuns de ce nombre ont predit de grandes et esmerveillables adventures :

H16 - Moy, en cet endroit ie ne m´attribue nullement tel titre. Ia a Dieu ne plaise, ie confesse bien que tout vient de Dieu, et luy rends graces, honneur, et loüange immortelle, sans y avoir meslé de la divination que provient de a fato: mais adeo, a natura, et la plus part accompagnée du mouvement du cours celeste, tellement que voyant comme dans un miroüer ardant, comme par vision obnubilée, les grands evenements tristes, prodigieux, et calamiteuses adventures qui s´approchent par les principaux culteurs. Premierement des temples de Dieu, secondement par ceux qui sont terrestrement soustenus s´approcher telle decadence, avecques mille autres calamiteuses adventures, que par le cours du temps on cognoitra advenir :

H17 - car Dieu regardera la longue stérilité de la grande dame, qui puis apres concevra deux enfants principaux : mais elle periclitant, celle qui lui sera adjoustée par la temerité de l´aage de mort periclitant dedans le dixhuictiesme, ne pouvant passer le trentesixiesme qu´en delaissera trois masles, et une femellle, et en aura deux, celuy qui n´en eut iamais d´un mesme pere, des trois freres seront telles differences, puis, unies et accordees, que les trois et quatre parties de l´Europe trembleront :

H18 - Par le moindre d´aage sera la monarchie Chrestienne soustenu&;, augmentee, sectes eslevees, et subitement abaissees, Arabes reculez, Royaumes unis, nouvelles Loix promulguees : des autres enfans le premier occupera les Lions furieux couronnez, tenants les pattes dessus les armes intrepidez.

H19 - Le second se profondera si avant par les latins accompagné, que sera faicte la seconde voye tremblante et furibonde au mont Iovis descendant pour monter aux Pyrennees, ne sera translatee a l´antique monarchie, sera faicte la troisiesme inondation de sang humain, ne se trouvera de longtemps Mars en Caresme.

H20 - Et sera donnée la fille par la conservation de l´Eglise Chrestienne, tombant son dominateur a la paganisme secte des nouveaux infideles, elle aura deux enfans, l´un de fidelité, l´autre d´infidelité par la confirmation de l´Eglise Catholique. Et l´autre qui a sa grande confusion et tarde repentance la voudra ruiner, seront trois regions par l´extreme difference des ligues, c´est assavoir la Romanie, la Germanie, l´Espaigne, qui feront diverses sectes par main militaire,

H21 - delaissant les cinquante et cinquante deuxieme degrez de hauteur, et feront tous hommages des religions loingtaines de l´Europe et de Septentrion de quarante degrez d´hauteur, qui premier par vaine timidité tremblera, puis les plus occidentaux, méridionaux et orientaux trembleront, telle sera leur puissance, que ce qui se fera par concorde et union insuperable des conquestes belliques. De nature seront esgaux : mais grandement differents de foy.

H22 - Apres cecy, la dame sterille de plus grande puissance que la seconde sera receu&; par deux peuples, par le premier obstiné par celuy qui a eu puissance sur tous, par le deuxiesme et par le tiers qui estendra ses forces vers le circuit de l´Orient de l´Europe aux pannons la profligé et succombé et par voylle marine fera ses extensions a la Trinacrie Adriatique par Mirmidons et Germaniques du tout succombé, et sera la secte Barbarique du tout des Latins grandement affligee et dechassee.

H23 - Puis le grand Empire de l´Antechrist commencera dans la Arda et Zersas descendre en nombre grand et innumerable, tellement que la venuë du sainct Esprit procedant du 48 degrez, fera transmigration, deschassant a l´abomination de l´Antechrist, faisant la guerre contre le royal qui sera le grand Vicaire de Iesus-Christ et contre son Eglise, et son regne per tempus et in occasione temporis,

H24 - et precedera devant une eclypse solaire le plus obscur, et le plus tenebreux que soit

été depuis la création du monde iusques a la mort et passion de Iesus-Christ, et de la iusques icy, et sera au moys d´Octobre que quelque grande translation sera faicte, et telle que l´on cuidera la pesanteur de la terre avoir perdu son naturel mouvement, et estre abismée en perpetuelles tenebre, seront precedans au temps vernal,

H25 - et s´en ensuyant apres d´extremes changements, permutations de regnes, par grands tremblements de terre, avec pullulation de la neusve Babylonne, fille misérable augmentée par l´abomination du premier holocauste, et ne tiendra tant seulement que septante trois ans, sept moys,

H26 - puis apres en sortira du tige celle qui avoit demeuré tant long temps sterille, procedant du cinquiesme degré, qui renouvellera toute l´Eglise Chrestienne, et sera faicte grande paix, union et concorde entre un des enfants des fronts esgarez, et separez par divers regnes : et sera faicte telle paix que demeurera attaché au plus profond baratre le suscitateur et promoteur de la martialle faction par la diversité des religieux, et sera uny le Royaume du Rabieux, qui contrefera le sage.

H27 - Et les contrees, villes, citez, regnes, et provinces qui auront laissé les premieres voyes pour se delivrer le captivant plus profondement, seront secrettement faschez de leur liberté, et parfaicte religion perdüe, commenceront de frapper dans la partie gauche, pour tourner a la dextre, et remettant la saincteté profligée de long temps, avec leur prestin escrit, qu´apres le grand chien sortira le plus gros mastin, qui fera destruction de tout, mesmes de ce qu´auparavant sera esté perpetré, seront redressez les temples comme au premier temps, et sera restitué le clerc de son pristin estat, et comencera a meritriquer et luxurier, faire et commettre mille forfaits.

H28 - Et estant proche d´une autre desolation, par lors qu´elle sera a sa plus haute et sublime dignité, se dresseront de potentats et mains militaires, et luy seront ostez les deux glaives, et ne luy demeurera que les enseignes, desquelles par moyen de la curvature qui les attire, le peuple le faisant aller droit, et ne voulant se condescendre a eux par le bout opposé de la main aigüe, touchant terre, voudront stimuler iusques a ce que naistra d´un rameau de la stérile, de long temps, qui delivrera le peuple univers de celle servitude benigne et volontaire, soy remettant a la protection de Mars, spoliant Iupiter de tous ses honneurs et dignitez, pour la cité libre, constitué et assise dans une autre exigue Mezopotamie.

H29 - Et sera le chef et gouverneur iecté du milieu, et mis au haut lieu de l´air, ignorant la conspiration des coniurateurs, avec le second Trasibulus, qui de long temps aura manié tout cecy : alors les immundicitez, les abominations seront par grande honte obiectes et manifestees aux tenebres de la lumiere obtenebree, cessera devers la fin du changement de son regne, et les chefs de l´Eglise seront en arriere de l´amour de Dieu, et plusieurs d´entre eux apostazieront la vraye foy, et les trois sectes, celle du milieu par les culteurs d´icelle, sera un peu mis en decadence.

H30 - La prime totallement par l´Europe, la plus part de l´Affrique exterminee de la tierce, moyennant les pauvres d´esprit, que par insensez eslevez par la luxure libidineuse adulteront. La plebe se levera soustenant et dechassera les adherans des legislateurs, et semblera que les regnes affoiblis par les Orientaux que Dieu le Créateur aye deslyé Satan des prisons infernalles, pour faire naistre le grand Dog et Doham, lesquels feront si grand fraction abominable aux Eglises, que les rouges ne les blancs sans yeux ne sans mains plus n´en iugeront, et leur sera ostée leur puissance.

H31 - Alors sera faicte plus de persecution aux Eglises, que ne fut jamais. Et sur ces entrefaicte naistra la pestilence si grande que, des trois parts du monde, plus que les deux defaudront. Tellement qu´on ne sçaura ne cognoitre les appartenans des champs et maisons, et naistra l´herbe par les rues des citez plus haute que les genoulx. Et au clergé sera faicte totale desolation, et usurperont les martiaux ce que sera retourné de la cité du Soleil de Mélite, et des isles Stechades, et sera ouverte la grande chaisne du port qui prend la denomination au boeuf marin.

H32 - Et sera faicte nouvelle incursion par les maritimes plages, voulant le sault Castulon delivrer de la premiere reprinse Mahometane. Et ne seront du tous assaillements vains, et au lieu que iadis fut l´habitation d´Abraham, sera assaillie par personnes qui auront en vénération les Iovialistes. Et icelle cité de Achem sera environnée et assaillie de toutes parts en tres grande puissance de gens d´armes. Seront affoiblies leurs forces maritimes par les occidentaux. Et a ce regne sera faicte grande desolation, et les plus grandes citez seront depeuplees, et ceux qui entreront dedans, seront comprins a la vengeance de l´ire de Dieu.

H33 - et demeurera le sepulcre de tant grande veneration par l´espace de long temps sous le serain a l´universelle vision des yeux du Ciel, du Soleil, et de la Lune, et sera converty le lieu sacré en hebergement de troupeau menu et grand, et adapté en substances profanes.

H34 - O quelle calamiteuse affliction sera par lors aux femmes enceintes, et sera par lors du principal chef Oriental, la plus part esmeu par les Septentrionnaux et Occidentaux vaincus, et mis a mort, profligez et le reste ensuite, et ses enfans de plusieurs femmes emprisonnez, et par lors sera accomplie la prophétie du Royal Prophete : Ut audiret gemitus compeditorum, ut solveret filios interemptorum.

H35 - Quelle grande oppression que par lors sera faicte sur les Princes et gouverneurs des Royaumes, mesme de ceux qui seront maritimes et Orientaux, et leurs langues entremeslees a grande societé, la langue des Latins et des Arabes, par la communication Punique, et seront tous ses Roys Orientaux chassez, profligez, exterminez, non du tout par le moyen des forces des Roys d´Aquilon, et par la proximité de notre siecle par moyen de trois unis secrettement cherchant la mort, et insidies par embusches l´un de l´autre, et durera le renouvellement de Triumvirat sept ans,

H36 - que la renommée de cette secte fera son étendue par l´univers, et sera soustenue le sacrifice de la saincte immaculée hostie : et seront lors les seigneurs deux en nombre d´Aquilon victorieux, sur les Orientaux et sera en iceux faict si grand bruit et tumulte bellique, que tout iceluy Orient tremblera de la frayeur d´iceux frere, non frere Aquilonnaires.

H37 - Et pource Sire, que par ce discours je mets presque confusement ces predictions, et quand ce pourra estre et l´advenement d´iceux, pour le denombrement du temps que s´ensuit, qu´il n´est nullement, ou bien peu conforme au superieur, lequel par voye Astronomique, que par autre, mesmes des sacrees Escriptures, qui ne peuvent faillir nullement, que si je voulois a un chascun quatrain mettre le denombrement du temps se pourroit faire : mais a tous ne seroit agreable, ne moins les interpreter, iusqu´a ce, Sire, que vostre Majesté m´aye octroyé ample puissance pour ce faire, pour ne donner cause aux calomniateurs de me mordre.

H38 - Toutesfois, contans les ans depuis la création du monde, iusque a la naissance de Noë, sont passez mille cinq cens et six ans, et depuis la naissance de Noë iusques a la parfaite fabrication de l´Arche, approchant de l´universelle inondation, passeront six cens ans (si les dons estoyent Solaire ou Lunaire, ou de dix mixtions) ie tiens que les sacrees Escriptures tiennent qu´estoyent solaires. Et a la fin d´iceux six cens ans, Noë entra dans l´Arche, pour estre sauvé du deluge : et fut iceluy deluge universel sur la terre et dura un an et deux mois. Et depuis la fin du deluge iusques a la nativite d´Abraham, passa le nombre des ans de deux cens nonante cinq. Et depuis la nativité d´Abraham iusques a la nativite d´Isaac passerent cent ans. Et depuis Isaac iusques a Jacob, soixante ans, des l´heure qu´il entra dans l´Egypte, iusques en l´yssue d´iceluy passerent quatre cens trente ans. Et depuis l´yssu&; a l´Egypte iusques a l´edification du temples faict par Salomon au quatriesme an de son regne, passerent quatre cens octante ou quatre vingts ans. Et depuis l´edification de Temple iusques a Jesus-Christ, selon la supputation des Hierographes passerent quatre cens nonante ans. Et ainsi par ceste supputation que j´ay faicte, colligée par les sacrees Lettres, sont environ quatre mille cent septante trois ans, et huit mois, peu ou moins.

H39 - Or de Iesus-Christ en ça, par la diversité des sectes je le laisse, et ayant supputé et calculé les présentes Propheties, le tout selon l´ordre de la chaisne qui contient sa revolution, le tout par doctrine Astronomique, et selon mon naturel instinct, et apres quelques temps et dans iceluy comprenant le temps que Saturne qui tournera entrer a sept du mois d´Avril, iusques au vingt cinq d´Aoust, Iupiter a 14 de Juin iusques au 7 d´Octobre, Mars depuis le 17 d´Avril iusques au 22 de Iuin. Venus depuis le 9 d´Avril iusques au 22 de May. Mercure depuis le 3 de Fevrier iusques au 24 du dit, et du 25 de Septembre iusques au 16 d´Octobre, Saturne en Capricorne, Iupiter en Aquarius, Mars en Scorpion, Venus en Pisces, Mercure dans un mois en Capricorne, Aquarius et Pisces, la Lune en Aquarius, la teste du Dragon en Libra : la queue a son signe opposite suyvant une conjonction de Iupiter a Mercure, avec un quadrin aspect de Mars a Mercure, et la teste du Dragon sera avec une conjonction du Soleil a Iupiter, l´année sera pacifique et sans eclipse,

H40 - et non du tout, et sera le commencement comprenant de ce que durera et commençant icelle année sera faicte plus grande persecution a l´Eglise Chrestienne, que n´a esté faicte en Affrique, et durera ceste cy iusques a l´an mil sept cens nonante deux, que l´on cuidra estre une renovation de siecle : apres commencera le peuple Romain de se redresser et deschassez quelques obscures tenebres recevant quelque peu de leur pristine clarté, et non sans grande division et continuels changements.

H41 - Venise en apres en grande force, et puissance levera ses aisles si hault, ne distant gueres aux forces de l´antique Rome. Et en iceluy temps grandes voilles Bisantines associées aux Ligustiques par l´appuy et puisssance Aquilonaire, donnera quelque empeschement que les deux Cretences ne leur sera Foy tenuë. Les arcs édifies par les antiques Martiaux, s´accompagneront aux ondes de Neptune. En Adriatique sera faicte discorde grande, ce que sera uni sera separé, approchera de maison ce que paravant estoit et est grande cité, comprenant le Pempotam de Mézopotamie de l´Europe a quarante cinq, et autres de quarante et un, quarante deux et trente sept.

H42 - Et dans iceluy temps, et en icelle contrée la puissance infernalle mettra a l´encontre de l´Eglise de Iesus-Christ la puissance des adversaires de sa loy, qui sera le second Antéchrist, lequel persecutera icelle Eglise et son vray vicaire, par moyen de la puissance des Roys temporels, qui seront par leur ignorance seduicts par langues, qui trencheront plus que nul glaive entre les mains de l´insensé. Le susdict regne de l´Antechrist ne durera que iusques au definement de ce nay pres de l´aage et de l´autre a la cité de Plancus, accompagné de l´esleu de Modone Fulcy, par Ferrare, maintenu par Liguriens Adriactiques, et de la proximité de la grande Trinacrie. Puis passera le mont Iovis. Le Galique Ogmium accompagné de si grand nombre que de bien loin l´Empire de la grande loy sera presenté, et par lors et quelques temps apres sera espanché profusement le sang des Innocens par les nocens un peu eslevez, alors par grands deluges la memoire des choses contenuës de tels instrumens recevra innumérable perte, mesmes des lettres :

H43 - Qui sera devers les Aquilonaires par la volonté divine, et entre une fois lié Satan : et sera faicte paix universelle entre les humains, et sera delivree l´Eglise de Iesus-Christ de toute tribulation, combien que par les Azostains voudroit mesler dedans le miel du fiel, et leur pestifere seduction et sera proche du septiesme millenaire, que plus le sanctuaire de Iesus-Christ ne sera conculqué par les infideles, qui viendront de l´Aquilon, le monde approchant de quelque grande conflagration, combien que par mes supputations en mes prophéties, le cours du temps aille beaucoup plus loing.

H44 - Dedans l´Espitre que ces ans passez ay dediee a mon filz Cesar Nostradamus, i´ay assez apertement declaré aucun poincts sans presage. Mais Icy, ô Sire, sont comprins plusieurs grands et merveilleux advenemens, que ceux qui viendront apres le verront. Et durant icelle supputation Astrologique, conferees aux sacrees lettres, la persecution des gens Ecclesiastiques prendra son origine par la puissance des Rois Aquilonnaires, unis avec les Orientaux. Et celle persecution durera onze ans, quelque peu moins, que par lors defaillira le principal Roy Aquilonaire, lesquels ans accomplis surviendra son uny Meridional, qui persecutera encore plus fort par l´espace de trois ans les gens d´Eglise, par la seduction apostastique, d´un qui tiendra toute puissance absolue a l´Eglise militante,

H45 - et le saint peuple de Dieu observateur de sa Loy, et tout ordre de religion sera grandement persecuté et affligé, tellement que le sang des vrais Ecclesiastiques nagera partout, et un des horribles Roys temporels, par ses adhérans luy seront donnees telles loüanges, qu´il aura plus respandu de sang humain des innocens Ecclesiastiques, que nul ne sçauroit avoir du vin :

H46 - et iceluy Roy commettra des forfaicts envers l´Eglise incroyables, coulera le sang humain par les rues publiques et temples, comme l´eau par pluye impétueuse, et rougiront de sang les plus prochains fleuves, et par autre guerre navale rougira la mer, que le rapport d´un Roy a l´autre luy sera dit : Bellis rubuit navalibus aequor. Puis dans la mesme année et les suivantes s´en ensuivra la plus horrible pestilence, et la plus merveilleuse par la famine precedente, et si grandes tribulations que iamais soit advenue telle depuis la fondation de l´Eglise Chrestienne, et par toutes les regions Latines. Demeurant par les vestiges en aucune contrées des l´Espaignes.

H47 - Par lors le tiers Roy Aquilonaire entendant la plaincte du peuple de son principal tiltre, dressera si grande armée, et passera par les destroits de ses derniers avites et bisayeulx, qui remettra la plus part en son estat, et le grand Vicaire de la cappe sera remis en son pristin estat, mais désolé et puis du tout abandonné, et tournera a estre Sancta Sanctorum destruite par paganisme, et le vieux et nouveau testament seront deschassez, buslez,

H48 - en apres l´Antéchrist sera le prince infernal, encores par la derniere fois trembleront tous les Royaumes de la Chrestienté, et aussi des infidelles par l´espace de vingt cinq ans, et seront plus grieves guerres et batailles, et seront villes, citez, chasteaux, et tous autres edifices bruslez, desolez, destruicts avec grande effusion de sang vestal, mariées, et vefves violees, enfans de laict contre les murs des villes allidez et brisez, et tant de maux se commettront par le moyen de Satan, prince infernal, que presque le monde universel se trouvera desfaict et desolé:

H49 - et autant iceux advenement, aucun oyseaux insolites crieront par l´air, Huy, huy, et seront apres quelques temps esvanouys. Et apres que tel temps aura duré longuement, sera presque renouvelé un autre regne de Saturne, et siecle d´or. Dieu le créateur dira, entendant l´affliction de son peuple, Satan sera mis et lié dans l´abysme du barathre dans la profonde fosse :

H50 - et adonc commencera entre Dieu et les hommes une paix universelle, et demeurera lié environ l´espace de mille ans, et tournera en sa plus grande force, la puissance Ecclesiastique, et puis tourne deslié.

H51 - Que toutes ces figures sont iustement adaptées par les divines lettres aux choses celestes visibles, c´est a sçavoir, par Saturne, Iupiter et Mars, et les autres conioinct, comme plus a plain par aucuns quadrins l´on pourra veoir.

H52 - I´eusse calculé plus profondement et adapté les uns avec les autres. Mais voyant, ô Sereninissime Roy, que quelques uns de la censure trouveront difficulté qui sera cause de retirer ma plume a son repos nocturne :

H53 - Multa etiam ô Rex omnium potentissime praeclara et sane in brevi ventura, sed omnia in hac tua epistola innectere non possumus, nec volumus : sed ad intelligenda quaedam facta horrida fata, pauca libanda sunt, quamvis tanta sit in omnes tua amplitudo et humanitas homines, deosque pietas ut solus amplissimo et Christanissimo Regis nonime, et ad quem summa totius religionis auctoritas deferatur dignus esse videare.

H54 - Mais tant seulement je vous requiers, ô Roy tres Clément, par icelle vostre singuliere et prudente humanité, d´entendre plustost le desir de mon courage, et le souverains estude que j´ay d´obeyr a votre sérénissime Majesté, depuis que mes yeux furent si proches de votre splendeur solaire, que la grandeur de mon labeur n´attainct ne requiert. De Salon, ce 27. de Iuin, Mil cinq cens cinquante huict.

Faciebat Michaël Nostradamus
Salonae Petrae Provinciae.